唔少人對耳機零舍有要求，現時流行聽入耳式耳機，貪佢能夠將音樂輸出照單全收。不過原來同耳唔同命，有人天生同膠無緣，耳仔戴戴吓都會跣番出嚟。Fit唔fitsize無劃一標準，最緊要自己試戴得舒服。想知邊隻耳機夠啜力，今日搵模特試畀你睇！
記者：王震遠
攝影：周旭文
Models：Kinki@FameEntertainment
最強Rock友耳機
論安全防跣程度，呢隻UltimateEars300算係最堅，任model左fing左fing，依然未見過由耳道滑出。全因為佢採用咗可塑型耳掛，可以調校適合自己嘅弧度扣實雙耳，仲有防汗式設計，大汗都唔怕滑走！耳塞採用軟矽物料，由XXS至L碼五個size選擇，揀啱大細自然夠晒穩陣。音質方面，UltimateEars300偏向低音，出廠時亦強化過低音，用嚟聽rock歌就最啱。
大牌三分音耳機
美國大牌Westone一向多捧場客，呢隻Westone4更係店舖最熱賣貨品。Westone4唔單止有膠耳塞，另外更附上記憶海綿耳塞，只要輕輕㩒一下，過一陣就會自然彈起，入耳之後更能貼實耳道，自然無咁易甩。音色方面Westone採用三路分音技術，高中低三音分拆由各自單元推動，所以喺三種不同音色範圍表現都好出色，低音有雄厚感，高音夠清脆。
升呢矽膠耳機
鍾意黑魂feel嘅用家，應該會對AltecLansingMZX606好有興趣。先講音色，MZX606採用動鐵單元，音色清晰有力，強勁而且細膩。最大賣點係佢用咗SnugFit矽膠耳塞，呢種質料特別有彈性，可以更接近耳道輪廓，感覺又舒服。而且佢更有好強嘅隔音效果，可以消除大量噪音，音色就更加細緻。另外MZX606更係為iPhone而設，有埋咪位同線控，一物兩用夠方便。
潮人三節膠
大玩Color外表嘅ETYMOTICMC5，一次過提供黑、紅、藍同綠四種顏色選擇，潮人必buy選擇。ETYMOTICMC5採用發展多年嘅動圈單元，控制音色方面做得最好，高中音表現細緻，低音感覺沉實，仲特別採用三節膠，隔音效果做得出色，已可達到35-42db。不過亦因為耳膠用咗隔音強勁嘅三節膠，所以防滑效果就差少少啦！
薄膠易走位
現時玩耳機的發燒友都追求動鐵單式機芯，UltimateEars旗下高階款TripleFi10就採用咗三單元嘅其中一款，音質表現靈敏度高，最適合用嚟聽音樂會。它的音調層次準確，三單元充份帶出高分析力，中低音由雙單元輸出，音色強勁。入耳式耳塞採用矽膠製品，因為短淺同較為薄身，所以戴起嚟吸啜力唔夠，就算動作唔大一樣容易滑走！
耳塞唔係個個啱
戴耳機聽歌最緊要係舒服，但如果成日戴戴吓甩出嚟會好掃興！亦軒耳機音樂世界市場推廣負責人Thomas指出，成日甩耳機有兩個主要原因，第一就係選擇錯誤耳塞size，第二係佢唔適合有膠產品。市場上主流耳塞有分矽膠同海綿兩種，如果用家耳道生得不規則，就應該改用海綿耳塞，因為佢會好似棉花咁發脹，頂實耳道。
至於夏天鍾意做運動嘅用家，如果天生油耳仔，再戴矽膠耳塞就好易滑出耳道。膠耳塞雖然耐用啲，成本較低，但呈圓球形狀，未必個個啱戴；而海綿耳塞隔音較好，不過唔襟用，一個月要換一次。
做運動宜半開放式
唔少人鍾意做運動時聽歌，但唔想焗住嘅話都會選擇入耳式，Thomas就另有看法。入耳式耳機同耳筒各有所愛，買邊隻主要取決於用途。入耳式耳機勝在可以全數接收聲音，適合專心聽音樂嘅用家；而耳筒就分開放式同半開放式，音質偏向自然，喜歡做運動亦可以選擇半開放式耳筒，除音樂外仲可以聽到馬路上嘅聲音，警覺性自然提高咗！
掛耳式玩過山車都得
如果真係想戴耳機得嚟點fing都唔甩，Thomas推薦用耳掛式耳機（Ear-hanger），上邊有個機身扣實耳仔，更加上入耳式耳塞包保萬無一失，理論上玩過山車都唔甩。Sennheiser有款專為運動而設嘅CX680耳筒，採用咗EarFin系統能夠確保耳塞穩妥咁留喺耳道，更加有防汗功能，基本上做咩運動都妥晒！
a.ThinkingGroup（29551000）
b.ActionGroup（29550033）