吳國敬涉喺去年尾，於清水灣寓所外同鄰居爭執後，攞刀喺梯間恐嚇對方，原定噚日喺觀塘裁判法院開審。惟控方決定唔提證供起訴，吳同意案情後，裁判官馬保華准佢自簽3,000蚊兼守行為9個月，其間唔可以非法打人同企圖打人，恐嚇打人亦唔得。吳事後表現風騷向記者發出飛吻。佢仲話：「今次有少少運，大步檻過！」
眼泛淚光
阿敬朝早9點幾喺女友陪同下到觀塘法院，開庭前明顯心情緊張，佢話呢兩個禮拜都失眠，當獲悉結果後即露歡顏，佢接受訪問時一度眼泛淚光話：「我覺得法官同香港市民好眷顧我，唔使有更重嘅刑罰，自己都有唔啱，經一事長一智，已後會控制自己EQ同temper（脾氣）。」
跟住阿敬會去日本散心，同埋準備新碟嘅嘢，佢再次感謝身邊嘅朋友支持，佢話：「Big4就唔使講，仲要多謝黎明、肥媽，多謝在天之靈嘅爸爸媽媽，最後我會畀心機做好音樂，因為我冇嘢叻，最叻係做音樂。」
案件編號：KTCC508/11