Banner係政黨嘅最強宣傳機器，你睇「僭建聯」嘅Banner無處不在，成功爭取嘅功績無奇不有，就知道Banner對政客嘅重要程度如食水如空氣。不過，香港街頭最近亦有惡搞Banner湧現，搞到唔少政黨好頭痛，最新嘅受害者係公民黨副主席黎廣德。
中環街市半山行人扶手電梯附近，近日出現咗一幅偽冒公民黨Banner，印有黎廣德個嘜頭同公民黨標誌，寫上「透過司法覆核成功阻大橋停沙中令700萬港人受惠」。擺明俾人惡搞，公民黨即時報警處理，不過預算冇乜結果。有公民黨中人話覺得今次都幾慘，其實佢哋一早講明支持興建港珠澳大橋，只不過環評未做好，涉及程序公義問題，呢個問題係要處理。