陳茵媺、王祖藍同阮兆祥等噚日喺將軍澳電視廣播城為無綫新劇《荃家福祿壽探案》拍外景，着上婚紗嘅陳茵媺感覺好似大咗肚咁，問佢係咪未婚懷孕？佢話呢個係六十年代嘅復古造型，高腰係當時嘅特色設計，佢話覺得自己好可愛。講到有周刊話陳茵媺同陳豪秘密結婚，陳茵媺話周刊嘅發展進度好神速，上星期先講佢哋拍拖，今日就已經結婚。
順其自然
陳茵媺話同陳豪仍然係朋友關係冇拍拖，感情嘅嘢就順其自然，問陳茵媺着上婚紗有冇恨嫁嘅感覺？佢話：「每個女仔都想結婚，自己亦有諗過，但家會以工作為重。」問陳豪係咪嫁得過？陳茵媺話：「佢係好男人，但要相處過，需要時間了解先。」
講到陳豪之前話會發動攻勢，而陳茵媺就話感覺唔到，但就強調兩個人一齊最緊要舒服，陳茵媺都承認對陳豪有好感，問佢擔唔擔心拖太耐令陳豪放棄？陳茵媺再次話愛情需要順其自然同舒服，而且大家都未見過對方家長。