西班牙傳媒剛披露巴塞來季嘅新主場波衫，因為胸口贊助商轉咗卡塔爾基金會，所以都幾多人注意。不過，我求大俠對呢件新波衫唔太意外，並唔係因佢嘅紅藍幼間唔吸引，而係偉大嘅祖國早已有山寨版，今次公佈只係肯定咗山寨版同正版冇咩分別，而且仲賣32蚊人仔，真係不得不佩服翻版之國。
至於巴塞日前聯賽主場煞科戰與拉科魯尼亞互交白卷，因為有場歐聯決賽在後，都已經預咗會派副選上陣，今季除咗主場開幕戰輸畀靴高斯係食蛋（0:2）外，聯賽再冇「士哥」就係呢場，都算係「好頭好尾」囉。另外，歐洲足協周一證實巴塞中場布斯基斯喺歐聯4強首回合，冇種族歧視皇馬馬些路，可以喺決賽上陣對曼聯。