咩叫跌咗個橙執番個桔?皇家馬德里嘅基斯坦奴朗拿度(C朗)就係人辦嘞!皇馬已經爭標無望,不過C朗就冇留手,周日作客贏維拉利爾3:1嘅聯賽,又省入兩粒,西甲射手榜足足拋離休息嘅美斯7球,首次成為西甲神射手呼聲極高,亦好大機會破埋名宿山齊士等名宿保持嘅西甲單季入球紀錄。
客破潛艇梅開二度
皇馬周日作客維拉利爾都算係例行公事,不過教練摩連奴就仍然好認真,派遣好多主力上陣,尤其係爭緊神射手嘅C朗。而一眾皇馬隊友都好識做,雖然17分鐘馬些路單刀建功,為皇馬先開紀錄,不過之後入球機會,就造就晒畀C朗。5分鐘後卡卡博到禁區頂罰球,呢啲機會C朗又點會放過,施展重炮射入。
平西甲單季入球紀錄
換邊後,維拉利爾一度由卡尼破蛋,點知C朗啲入波運,到補時階段都仲有;迪馬利亞又博到罰球,C朗一聲唔該又「響袋」,呢場入兩粒,其實以呢3場計已經少咗,不過都夠晒數拋離美斯。
唔經唔覺C朗近3場入咗9球,累積聯賽入球達到38球,已經平咗山齊士及沙拉嘅西甲單季入球紀錄(見附表),下場西甲煞科戰對篤定降班嘅艾美利亞,只要繼續有貨交,C朗更加可以獨霸。由於皇馬教練摩連奴繼續玩封口,賽後記者會由助教卡蘭卡出席,卡蘭卡就話:「雖然勝負對排名於事無補,不過己隊仍然有很多目標,C朗成就了球會另一紀錄,我們也希望成為今季入球最多的球隊。」
巴塞打入歐聯決賽,爭神射手呢啲嘢,美斯就梗係擺埋一邊;周日主場對拉科,哥帥就收起美斯、沙維等主力,安心係後備席,睇方達斯、約拿芬杜斯山度士、謝法倫等師弟比賽。因為巴塞留晒力,僅和對手0:0。最後一場聯賽作客馬拉加,除非美斯神奇地入7粒,否則阻止唔到C朗成為神射手嘞!