港鐵獨攬香港鐵路服務，又同地產商聯手起樓，加劇地產霸權。喺噚日立法會控訴港鐵又加費嘅武林大會上，「香港絕望」召集人楊繼昌話港鐵比地產商更霸道，係地鐵加地產霸權，簡稱「地加產霸權」，出席嘅團體代表拍掌和應。社民連派咗行政主任黃浩銘狙擊港鐵，勁鬧港鐵以交通為名、地產為實，係香港最惡發展商。講完後佢行出位，話要送抗議物品畀港鐵代表，幾個保安即刻衝出嚟。港鐵副公司事務總經理王美琪行出位接咗個物品，以柔制剛，搞到阿銘激唔起。最激反而係會議主持鄭家富，佢話港鐵咁加價法，「奇怪仲未有人瞓路軌」，重現97回歸瞓街抗議嘅激情。