為教學生涯作結，小思好自信話佢係一個好老師，亦係一個好嚴厲嘅老師，早十幾年上堂直頭係黑口黑面。八方問過佢學生、家喺中大教中文嘅高級導師張詠梅，佢話當年碩士論文係由老師指導，佢交初稿嗰陣，就被老師嘅嚴詞批評到體無完膚，「我仲以為自己做得好好……我真係唔開心喊咗幾日，但係都好明白佢係為我好。佢退休前嗰十年冇咁嚴厲啦，仲好貼近學生」。
老師另一位高足、同樣喺中大教中文嘅何杏楓副教授就話，相對老師嘅「黑」，佢更加記得老師嘅「深寶藍」，「十幾年前佢上堂幾乎日日都係着深寶藍色衫，有次去佢屋企做研究，見到各款衫都係深寶藍色，畀我感覺係沉實有底蘊，不過近年佢都有着其他色。有次喺升降機見到有人着鮮黃色風褸，先發現係老師，令我眼前一亮」。二人先後成為中文科老師，佢哋話老師嘅啟發功不可沒。