【模範生】城中至潮蒲點KeeClub太子女龍殿兒（Mara）自言是個小大人，自小從父親經營夜店中學曉無遠弗屆脈絡平台的威力。學業成績straightA的Mara，得天獨厚擁有模特兒的高䠷骨架，決定暫放下萬卷書，嘗試鍾愛的時裝世界，投身捧紅其契姐Danielle及樂基兒的模特兒公司Calcarries旗下，實行行萬里路做模特兒，希望擴展她的社交connection為短期目標，藉此增加知名度做慈善回饋社會才是她的終極理想，最想學習她的偶像安琪蓮娜祖莉，助己助人。
上流社會名店KeeClub太子女龍殿兒三年前出席時裝活動即被捧為ball場新鮮人，之後低調到了歐洲完成Olevel學業，成績更是straightA高材生。Mara去年完成高中，近月返港，暫擱置讀大學，加入捧紅樂基兒及Danielle的Calcarries，嘗試發展模特兒事業。
遺傳高䠷身材
19歲的Mara五官標致，遺傳了奧地利裔父親的高䠷身形、中國血統母親的線條骨架已經是擁有做model的外在筍盤材料，自小學體操習騎馬，加上她能操流利普通話、廣東話、英語、德語等多國語言，絕對是藍血尖子一族，條件及選擇都比別人優厚。
90後的Mara笑言自己是小大人，成長於大人圍繞的環境更令她比同輩成熟，想法亦比較立體實在，她以廣東話表示：「爹哋開餐廳，識到好多唔同階層嘅人，個個都大過我，我好少同同年紀嘅人出嚟玩，好似我9歲時識20歲嘅Danielle，成日一齊去街，佢係我bigsister，之後仲做咗我契姐。習慣同大人相處，所以讀小學嗰時都有啲唔開心，會成日同父母傾偈，計劃將來。」
對於自己學業及事業命途思路清晰明確，玩票與沙紙同樣兼顧，Mara表示：「如果要讀名牌大學一定有人收，不過我唔想用三年做同一樣嘢，我想要多啲彈性，我家會parttime做model，唔代表我唔去讀書，我7月同9月都會去英國讀關於environmentstability嘅課程。」Mara表示自己愛時裝，更想過有關時裝行業的課程，亦曾於ChristianLouboutin、Dunhill等牌子短暫工作過，她說：「我做模特兒最希望可以擴展自己嘅網絡平台，呢一個工業可以接觸到好多唔同階層嘅人，多啲朋友，choiceisbigger。」
立志回饋社會
作為做模特兒的目標，Mara重名多過利：「做模特兒係好辛苦，自己係想出名，最希望可以得到代言合約，有咗名就可以幫其他人，好似安琪蓮娜祖莉（AngelinaJolie），佢事業成功出咗名，會幫番社會，去非洲做義工，可以幫到人，回饋社會。」
對於模特兒的要求，Mara笑言：「見到好多模特兒好辛苦，成日要節食減肥，我係會keep住做運動，一個禮拜做三日hotyoga，自己本身係素食者，我雖然唔係最瘦，唔會刻意減肥，呢行唔係淨係鬥瘦鬥靚，亦都唔係露得就露，做model要有自己諗法，要有自己character，唔可以冇咗自己，好似姬蒂摩絲（KateMoss），佢唔係最靚，佢人生亦有起跌，不過佢啲廣告作品真係表達到佢型、吸引一面。」
採訪：RitaLeung 攝影：MatthewLam
髮型：YumeWongofXenter 化妝：KarenYiu
服裝：BurberryProrsum、Celine
場地：Alfie'sbyKEE（中環太子大廈）
龍殿兒Profile
英文名：MaraRhomberg
出生日期：1991年10月6日
年齡：19歲
身高：5呎9吋
三圍：34、26、37
賣Tee助雲南貧童
Mara透露自小受父母愛鑽研佛學的薰陶，父親更教她要有幫助別人的善心，最近她身體力行與好友攝影師戴妮廷及兩名外籍男模特兒友人Jason及Mike合作做慈善teeproject，於其父名下的KeeClub義賣，為雲南麗江一間名為森吉梅朵慈善學校，專為貧困山區兒童非牟利的寄宿學校籌款。
Mara說：「之前同爹哋去過呢間學校，係一個尼姑義務開辦，我哋仲support咗三個小朋友，睇到啲小朋友面對逆境，平時自己所謂嘅煩惱根本不是大問題。」
