隔牆有耳：鬍鬚曾晒薄熙來合照 - 李八方

鬍鬚曾通波仔後搞出史上最廢財政預算案，政壇早覺得佢無心戀戰，特首沙圈上佢連影都冇埋。不過世事無絕對，一份咁垃圾嘅預算案都可以通過，2012年嘅事有邊個講得埋？鬍鬚曾噚日喺網誌撰文，表面上講4月中外訪成都、重慶見聞，骨子裏呢，就有意無意想展示吓喺內地官場嘅人脈關係。
佢特別提到喺重慶同市委書記薄熙來同市長黃奇帆會面。薄熙來好可能係中共接班人。鬍鬚曾不忘話自己同薄熙來認識多年，05年做工商科技局局長時，對方係商務部部長，有好多工作接觸，「他對我的工作十分支持」，佢仲喺網上展示兩人合照。之後佢又喺重慶市政府一座辦公樓留影，同一地點，當年有毛澤東同蔣介石一齊合照，今日就有hea做財爺到此一遊。