奇招百出院校為求吸金 曾送iPod招生

奇招百出
院校為求吸金 曾送iPod招生

副學位院校「使橫手」,招式層出不窮,以往在政府監管不周下,院校買一送一、報名送iPod等招式時有發生,近年政府雖嚴打違規,但院校導師私下透露,有學校仍然「踩鋼線」以違規手法處理校務,確保收生不會出問題。
於某副學位課程院校任教的趙sir(化名)表示,谷分並非新鮮事,「浸大呢啲谷分,喺其他院校都唔係新奇事,不過係冇加得咁多分,同埋冇人敢企出嚟指證啫」。

不合資格 照收逾3%

趙sir續指,八大附屬院校一般較守規矩,但一些小型院校至今仍運用各種小手段保收生,「舉個例,入學係有最低要求,唔合乎資格嘅係唔可以收多過全校3%,有學校肯定收多過3%,收多一個就多份學費,巡查交報告嗰陣咪做少少手腳過關」。
教協會長馮偉華承認,諸如浸大谷分一事僅屬冰山一角,業界仍然有不少盲點,來年新學制更可造成亂局,「因為下年合資格但係入唔到大學嘅學生數目會大增,佢哋會退而求其次讀自資學位同副學位,到時一定有人會從中撈油水,政府一定要做好監察工作,大學日後同附屬學院分家之後,亦要確保資源足夠,避免學校為錢亂收生」。