自由黨銳意喺今年區議會同明年立法會選舉一雪前恥，自然要多聆聽市民心聲，急市民所急，唔可以淨係為工商界服務。要打動基層市民歡心唔係太難，早前佢哋喺各區大派叉燒飯同向長者送電器，即時有唔少基層大讚like。
最近佢哋又收到市民另類建議，有街坊同主席劉健儀表白，好想自由黨嘅地區辦事處有免費WiFi，等佢哋可以免費上網。
由於呢個建議新鮮滾熱辣，暫時未可以喺現有辦事處做到，但劉健儀承諾聽到意見，換言之有望實行。
八方聽聞最有可能試行嘅，應該喺稍後先至入伙嘅石硤尾白田辦事處；如果反應好，應該有機會擴展去其他地區辦事處啩，到時一眾自由黨地區辦可能變成區內網吧都未定，唔通呢個就係佢哋吸納年輕人嘅秘密武器？