中文大學教授盧瑋鑾（小思）噚日獲校方頒受榮譽院士，八方有幸同呢位被譽為「香港冰心」嘅作家傾偈，佢話平生最唔鍾意人叫佢教授，因為呢個只係一個職稱，不妨叫佢一聲老師，八方於是細聽親切嘅小思老師細訴30年難忘教師情。
老師64年喺新亞書院中文系畢業，教過幾年中學，喺保守嘅七十年代，佢教嘅一對學生唔小心「搞大咗」，令佢遭受莫大壓力；件事雖然擺平，但係就令到佢好困擾。喺佢老師唐君毅勸導下，佢停學一年去咗日本京都做研究，結果先發現，自己嘅終身職業只有教師一途。
用楊千嬅歌詞導讀
回港後加入母校中大任教，教鞭一執24年，見盡中大人才輩出。唔少人話年輕人一代不如一代，老師話佢唔鍾意呢個講法：「時代係改變緊，學生改變都係合情合理。每個年代嘅後生仔都有佢自己睇法，對合理嘅嘢要爭取，正義嘅事要表態，公平啲講，佢哋都係受成個社會影響。」
學生由70後變成80後、90後，老師冇話一本通書睇到老，「好似古錢，要外圓內方，原則上一定有嘢要堅持」。不容許學生遲到講電話，但講課貼近潮流，同中學女生談《詩經》，佢用楊千嬅《處處吻》歌詞導讀；閒時上網睇潮文update，有空更會睇漫畫打機，「我有打wii，盜墓者羅拉都玩過，最鍾意玩賽車」。
教學生，老師話最緊要動之以情，教育政策佢管唔到，只希望政府唔好抹煞文學史科。行年七十有一，老師說眼下仍有心願未了，「我想完成一份文化人口述歷史，同埋研究香港文學嘅資料，報答養我育我嘅香港同中大，好多人話香港係文化沙漠，其實好多人一直默默耕耘。」望住眼眶通紅嘅老師，八方衷心祝願老師願望成真。
除咗小思，噚日仲有七位社會知名人士獲中大授予榮銜，包括陳兆愷、周松崗、梁雄姬、劉應力、譚尚渭、朱民康同埋鄭承隆。
mailto:[email protected]