蓮花激似拉利　自動色誘

上年架Evora一改蓮花玲瓏浮凸嘅Style，新版更噴上紅、白專色，望落勁似拉利及林寶，相當惹火！最正係唔再死守棍波，轉配6速自動波箱，西裝友同OL一手一腳舞得掂，可以舒舒服服揸返工。

記者：徐影龍
攝影：周旭文　
模特兒：Dominic、Jeana@GME

終於可作代步之用

■由青蛙頭燈改成尖長形狀，令Evora霸氣更勝其他蓮花。

嚴格嚟講，Evora唔算Facelift改款，只係代理引入多項改裝Kit及Option，讓蓮花迷配搭出最愛組合。紅、白兩款專色，比之前淺藍及灰綠更Sharp更醒，襯上變得更方更霸氣嘅車身線條，望落有幾分拉利及林寶味道，就連拍攝時，途人都誤以為係新款法拉利。
Evora其實定位唔再係狠劈戰車，車廂及設備偏豪華舒適，但棍波版喺香港始終令唔少人卻步。新版最令人驚喜的，係連Evora都可配搭自動波，仲係6速IPS自動波箱。實地試過，坦白講自動波起圍反應只比棍波慢少少，中尾段反應已可迅速Pick-up，若轉入軚波+/-操控，更係幾乎無分別，而且引擎轉數相對無咁高到嘈吵，較寧靜兼慳油。最重要係舒服易揸，唔會再當蓮花係SecondCar，絕對可以用一個D波返工、HighTea兼Shopping。

■車頭輪廓配上最新專色，望落有幾分似拉利F458。

■尾翼車尾設計到一體式，配紅色更靚。

三大Kit幫Evora升級

新到改裝Kit大致分三類，包括SportPack、PremiumPack及TechPack，內容包羅萬有，男人會愛上新款專屬胎軨、黑色四遮鮑魚、鈦金屬氣喉等，就連性能表現都有得Tune，如踩高500轉嘅SportMode，又或動態循迹系統等，加埋令人同車都更為熱血。
女士們一樣有着眼點，可自襯紅、灰、白、啡等真皮內櫳，仲有全套Apline貴價多媒體設備，如音響及喇叭、輕觸屏幕GPS、泊車鏡頭及藍芽免提等，有佢哋陪住你遊車河，絕對係賞心樂事。