著名武俠小說作家查良鏞千金查傳訥，噚日喺堅尼地道視覺藝術中心搞咗首個個人畫展，老竇金庸當然撐場支持，仲call齊寫作界嘅老友倪匡、李純恩、吳維昌醫生同女星顧紀筠做剪綵嘉賓，賭王二太藍瓊纓亦有送花牌到賀，十分畀面。查大俠冇接受訪問，但係現場就笑得好開心。
查傳訥話今次展出60多幅以「魚眼看世界」為題嘅作品，用咗10個月籌備，仲去咗長洲、大嶼山搵靈感，爸爸最鍾意係紅色魚嘅作品。佢話其中一條升仙嘅魚係自己，有佛家思想。今次畫展所售賣嘅畫冊，扣除成本，會為香港貧窮弱聽小童籌錢買助聽器，查傳訥下一批畫冊會幫天水圍嘅小朋友籌書簿費，行俠仗義幫助本地弱勢社群。