喺08年嘅立法會選舉，自由黨損兵折將，鄉議局主席劉皇發仲被怪責冇為前主席田少同前副主席周梁淑怡喺新界東、西拉票，最後仲退黨收場。不過，政圈邊有永遠嘅敵人？發叔噚日就笑笑口獻出佢兩年多嚟「第一次」──應邀出席自由黨喺大埔嘅地區辦事處開幕禮，仲畀足面坐足全場先走人，睇嚟已經同自由黨冰釋前嫌，和好如初咯。
賀辦事處開幕
自由黨要喺新界東收復失地係公開嘅秘密，所以佢哋噚日喺大埔區開咗首個新東辦事處外，喺北區同將軍澳嘅辦事處稍後亦會開張辦公，連同原有喺沙田嘅區議員辦事處，新東嘅各個重要據點大致都有盤據點。
雖然丁屋僭建風波來勢洶洶，但發叔都唔怕記者圍攻，又唔避忌同處理丁屋問題嘅發展局局長林鄭月娥同台現身自由黨辦事處開幕禮祝賀，仲直認係退黨後第一次。黨主席劉健儀好識做，多謝發叔大駕光臨，強調同發叔關係一路幾好，唔太差o架，點會有恩怨？田少就大冧發叔，話佢係鄉議局主席，新界東、西支持者眾多，自由黨當然希望同鄉事派保持友好關係喎。
成功打通返鄉事派脈絡，都係時候要諗吓人選問題。要喺新界東東山再起，田少一定係最適合人選，贏咗仲可以一雪前恥，不過田少噚日一聽係咪喺新界東復出時，就笑笑口話新界東大計由劉健儀負責，可能費事賣花讚花香。劉健儀強調未有出戰人選o架，但重申佢哋一路無放棄過參與直選，更加無放棄新界東，之前都係因為搵唔到竇口，先至搵唔到人瞓身參與。
既然家搵到落腳點，係時候叫田少多啲落嚟打躉啦？田少聽到即刻話：「主席叫到一定嚟。」劉健儀係時候要落柯打喇。
mailto:[email protected]