曼城領隊文仙尼要型、唔俾人淋酒，但多蒙特班高層同教練就大方得多，同球員打成一片，唔介意冲啤酒浴。冠軍多蒙特喺前日德甲煞科戰，正式喺主場捧隻聯賽冠軍碟；教練高路普成為球員目標，俾人追住嚟淋，佢亦鬼咁enjoy，同文仙尼完全兩個樣。之後佢同球會行政總監屈斯基、傳訊總監舒歷克出席記者會，班球員一樣唔放過佢照頭淋；多蒙特自02年後再贏德甲，咁高興，所以班高層都坐定定，任由班球員成大杯啤酒照頭淋，同日仲即時巡遊。
另外，禾夫斯堡前日反勝賀芬咸3:1護級成功，賽前禾堡教練馬加夫承諾，如果隊波成功護級，就捐自己部名車賓利畀慈善機構，我求大俠相信佢好樂意咁做；但中場迪亞高知道自己喺前日場波冇正選踢後，就擅自離隊，事後被罰款。
