射香檳或者淋啤酒係球員捧盃後嘅定指慶祝動作，有時連領隊或教練都唔放過，但唔係個個主帥都咁玩得；好似以姿整見稱嘅曼城領隊文仙尼咁，日前佢喺英足盃決賽頒獎禮上，俾迪斯高淋濕少少後有啲「唔老利」，令曼城球員冇乜癮，唔敢同佢玩。
曼城前晚喺英足盃決賽憑耶耶托尼一箭定江山，以1:0贏史篤城，結束長達35年嘅獎盃荒，仲決定喺今個月23號勝利巡遊。賽後班球員梗係興奮啦，個個玩到癲，仲玩埋領隊文仙尼。
迪斯高唔識死照淋
喺草地等影威水相時，大衛施華率先偷襲文帥，用手指搞佢個招牌七三分界蛋撻頭，係咁撥佢啲頭髮；文仙尼呢刻都冇乜嘢，淨係作狀想還拖打大衛施華。迪斯高見狀就將行動升級，從隊友手上接過香檳後，兜頭淋落文帥度。
話晒文仙尼踢波出身，身手有番咁上下，彈到幾丈遠，只係左邊膊頭濕咗少少；佢順手搵條曼城頸巾係咁抹，慌死整污糟套靚西裝；被噴後嘅文帥明顯「唔老利」，向迪斯高訓話；高拉洛夫見勢色唔對，只敢用支未開蓋嘅香檳作狀射文仙尼，但文仙尼就完全處於戒備狀態，表現得鬼咁緊張。班球員見文仙尼唔玩得，惟有收手。
「腦殘」玩蕉爆粗
文仙尼向來走偶像派路線，次次比賽都執到正，如果俾人兜頭淋，真係乜嘢形象都冇晒，所以梗係唔願意同球員玩埋一份啦！更何況，佢話球隊禮拜二仲要喺英超再對史篤城，已落咗禁酒令，唔准班球員喺贏咗英足盃後飲酒慶祝，咁佢當然要身體力行啦！
話時話，喺文仙尼俾迪斯高淋酒之前，我求大俠見到周不時俾人種族歧視嘅巴洛迪利，竟然同隊友玩吹氣香蕉；而佢賽後接受電視台訪問時，又忍唔住爆粗。「腦殘」果然冇得救。
唔老利逐格睇
迪斯高從高拉洛夫手上接過香檳，諗住兜頭淋文仙尼，好彩文仙尼身手好，淨係件西裝濕咗少少咋。
互聯網