【本報訊】民建聯立法會議員陳鑑林被踢爆知法犯法，裝修沙田坳道的丁屋大宅時不但僭建天台玻璃屋，更公然將存放雜物的貨櫃霸佔村口官地。陳鑑林夫婦昨日「唱雙簧」狡辯稱霸官地、建玻璃屋獲沙田地政處「默許」、政府對此「有默契」，圖拉政府部門落水轉移視線。地政總署高調澄清，署方早已發信飭令陳鑑林停佔官地，有關僭建物亦已交給屋宇署處理，與陳劃清界線。
記者：梁德倫 蔡朗清
本報昨午到陳鑑林位於沙田坳道十二笏村的丁屋大宅視察，發現霸佔村口官地長達半年的貨櫃仍未移去。記者前往陳宅門前，陳鑑林不在家，其妻曾衞明則在屋內執拾物件。記者尚未道明來意，她已自行打開大門動氣說：「我覺得你哋（《蘋果》）煲大咗，做頭條A1，係咪想同陳鑑林宣傳？」她一臉理直氣壯地稱，寓所玻璃屋及花槽不是僭建物，「屋頂玻璃屋係用嚟擋太陽，唔係用嚟擺嘢」，又說：「我知貨櫃佔用咗官地，我哋同地政處溝通咗，係因為條路（沙田坳道）維修緊，吊車入唔到嚟吊走個櫃。」
陳鑑林昨午在立法會向記者堅稱，僭建和霸佔官地兩事上他並無知法犯法，而是依法做事，「成個新界咁多村屋，有一啲普遍問題，唔係外人可以知道同了解」。他反指傳媒的指控言過其實，「我見到隔籬左右都係差唔多規格」。
自爆細屋亦屬僭建
對於其雜物貨櫃非法擺放村口官地超過半年，被地政總署多次警告，陳鑑林聲稱只因家人裝修延期，加上附近路段正有維修工程，所以未及時搬走，「我唔覺呢啲有乜咁大違規」，又指事前已知會沙田地政處，「同佢哋講咗裝修完會搬走（貨櫃），唔存在霸用、佔用官地，地政處佢哋冇反對，同意我哋擺，擺到四月底」。
被問及地政處是否容許他繼續擺放貨櫃時，陳鑑林則稱：「唔係唔係，我哋係要搬走佢。」至於具體日期，他稱「唔知道」，只稱會盡快。
陳鑑林又自爆用作遮蓋石油氣的細屋嚴格來說亦屬僭建，但指有關做法在新界相當普遍，「呢啲問題要城市人理解，佢哋係有咁嘅特殊需要。你話呢啲啱唔啱，梗係唔啱啦，但係我哋要用一啲客觀態度睇呢啲問題」。他形容，屋宇署平日與鄉村代表就僭建問題交換意見時，「有啲係（屋宇署）容許嘅，有啲係（屋宇署）默許佢哋去做」。
陳鑑林昨晨接受港台訪問時強調，政府多年來對這種情況有默契，他不會清拆有關僭建物；他下午在立法會受訪時則稱有關設施「全部原本已經有」，不覺有問題，但稍後會以身作則與地政處商討符合法例的做法，「例如向佢租，必要時可拆咗佢，嗰啲都唔會影響我哋居住，我哋都唔係用嚟住人，花槽只係想美化環境」。
議員紛指做壞榜樣
多名立法會議員批評陳鑑林是市民的壞榜樣，民主黨李永達指有關做法對政府執法帶來壓力。民建聯主席譚耀宗昨稱，會提醒該黨議員不可違法。
陳鑑林聲稱貨櫃霸官地及僭建是與地政總署有默契，地政總署昨晚出新聞稿反駁，跟他劃清界線。發言人強調，沙田地政處已於十二笏村9號屋前對開官地上的貨櫃張貼告示多時，通知有關人士停止佔用官地，但由於貨櫃至今仍然擺放在官地上，所以處方已經通知承辦商跟進處理該貨櫃，至於有關僭建物亦已交由屋宇署處理。地政總署如此說，明顯是拒絕向陳鑑林賣賬。屋宇署發言人表示，昨午曾派人到場視察，現階段不評論陳鑑林的丁屋有否僭建，但強調若發現有僭建物，會盡快跟進處理。
陳鑑林語錄
‧同佢哋（沙田地政處）講咗裝修完會搬走（貨櫃），唔存在霸用、佔用官地，地政處佢哋冇反對，同意我哋擺，擺到四月底。
‧三樓比較熱，所有村屋以前同地政處有默契，建簷篷、玻璃屋遮熱，我只不過將玻璃屋翻新。
‧我唔會咁做（拆去玻璃屋及花槽），我哋一做，新界其他村屋都係咁樣。
陳鑑林妻子語錄
‧以前新春團拜你哋記者上嚟我屋企，地下都有花槽，嗰陣唔見話有問題，家就話僭建。
‧我覺得你哋（《蘋果》）煲大咗，做頭條A1，係咪想同陳鑑林宣傳？
‧屋頂玻璃屋係用嚟擋太陽，唔係用嚟擺嘢，你哋話有問題咪拆咗佢。
