江湖將會掀起一陣腥風血雨，唔係講崩牙駒出返嚟，而係各大食神磨刀霍霍，銳意爭奪旅發局今年第10屆美食之最大賞特設嘅「蝦餃之王」寶座。點心成日俾人叫做「蝦餃燒賣」，都係蝦餃行先，可見其江湖地位，不過負責做評判嘅食家韋基舜就話，今時今日嘅蝦餃，好多做得唔夠精緻：「點心嘅意思本來就係細緻，搞到蝦餃隻蝦大大隻，點似樣？」
韋基舜噚日仲喺美食之最大賞記招話，當年茶樓雖然好多都冇冷氣，但啲食客仲係爭住坐近廚房唔怕熱，就係因為要第一時間爭奪新鮮出籠嘅蝦餃，「啲師傅會將熱騰騰嘅蝦餃七、八籠咁叠起攞出嚟，大家爭住攞嚟食，坐得遠廚房，隨時攞唔到」。
蝦餃要精緻皮薄
佢又話，要做蝦餃之王，用料最重要，蝦一定要新鮮，但唔使大大隻，「要細先夠精緻」；另一樣重點就係要皮薄，唔會咬落去硬邦邦，但用筷子挾起時，啲皮又唔可以穿喎，「因為靚蝦餃裏面要有汁，穿咗咪漏晒出嚟囉」。八方問佢邊間酒樓食肆嘅蝦餃可以稱王，佢就話自己係評判唔方便講。
大賞今年有四個組別，各組設「至高榮譽金獎」、「金獎」及「銀獎」殊榮，其中點心組另設蝦餃之王，總評判係韋基舜。「羮」組總評判係食家唯靈；「飯」組總評判食家黃雅歷；「蔬菜」組總評判就係餐務管理協會永遠會長楊維湘。
大廚仲要迎合國際口味，因今屆評審有唔少海外名廚，例如兩位米芝蓮星級名廚，包括法國嘅PascalNibaudeau、德國嘅TimRaue，仲有新加坡WillinLow、澳洲華裔名廚鄺凱莉（KylieKwong）及台灣嘅吳恩文。
旅發局主席田北俊話，美食係香港重要嘅旅遊賣點，舊年過夜旅客餐飲消費，總共帶嚟超過150億元收益，比2009年上升超過四成。
大賞正接受報名，7月4日截止，8月10及11日舉行決賽，仲會印喺11月份出版嘅《2011美食之最大賞滋味指南》，俾旅客市民按圖搵食。
得獎大廚仲可以到歐美巡迴推廣香港嘅美酒美食。上屆大賞得獎者朗豪酒店「明閣」嘅黃智輝師傅，就係去美國參加著名嘅Food&WineClassicinAspen，示範以香港嘅中菜美食配搭美酒。
邊間好食？
食家劉健威
家嘅蝦餃鬥大件，啲蝦大過乒乓波，好肉酸，好似三、四十年前啲三藩市唐餐咁。點心要細細件，將靚蝦、冬筍、豬肉砌粒，少少咁包喺薄皮裏面，咁先叫蝦餃王。推薦試吓海都嘅蝦餃。
名廚余健志
今時今日唔少酒樓，多數問食物工場攞貨，新鮮程度始終唔夠自己做好，所以我會揀名都酒樓嘅自家製蝦餃。蝦餃嘅皮好重要，澄麪同水嘅比例要調校適中，先至會又薄又有咬口。
名廚周中
如果選蝦餃之王，我會揀四季嘅龍景軒。因為佢哋嘅蝦餃符合傳統靚蝦餃嘅原則，就係皮薄唔黐，蝦料又靚。仲有，傳統蝦餃嘅餡，仲要加埋筍同豬肉，咁先至會香。
mailto:[email protected]