五月十日本欄講「拳王與女排」，指中國女排球員被逼念毛詩《長征》，話可以振奮士氣喎，真係信不信由你。一位讀者來郵話，十幾年前，內地人民已將「長征」改為「抵死啜核打油詩」，兩詩相比如下：
紅軍不怕遠征難 （當官不怕喝酒難）
萬水千山只等閑 （千杯萬盞只等閑）
五嶺逶迤騰細浪 （鴛鴦火鍋騰細浪）
烏蒙磅礡走泥丸 （生猛海鮮加魚丸）
金沙水拍雲崖暖 （桑拿洗得周身暖）
大渡橋橫鐵索寒 （麻將搓到五更寒）
更喜岷山千里雪 （更喜小姐肌如雪）
三軍過後盡開顏 （三陪過後盡開顏）
咦，咁講法，假如男排球員錯念打油詩嘅話，豈不想入非非，打波搓波軟如棉，彈跳無力？
本欄五月十一日講「學生能出外就是好」，有幾位讀者來郵支持，另有讀者質疑三千元資助可以遊學多久？呢樣好難講嘅，唔通每一位清貧學生出外，都要得到百分百支持咩？外國好多學生孭住背囊到處遊蕩，左丁山在曼谷街頭見過唔少，佢地一定唔係有錢學生啫，假如有人辛苦積蓄到一小筆錢，參加遊學團，再得到關愛基金支持三千元，就可以成行啦！事實上，每年本港不少大學生出外遊學、交換，都唔係一定自己全費嘅，譬如一啲有錢學院就資助不少學生出外，到美國上暑期班。昔年左丁山有一位師兄，畢業後到日本自費留學讀碩士，靠兼職（洗碗打掃）支付生活費，騎單車遍遊日本，後來又到巴黎，騎單車遊歐洲，到處打散工，曾在公園露宿，搵到少少錢就再上路，令我地非常佩服。唔係話每個學生都可以咁做，但如有關愛基金願意支付三千元經費，應該係一個好開始，「遊學」其實未必需要聽書寫報告，總之係出外一遊，耳聞目睹外地風情，已經對個人見識有幫助。一位日裔富豪康本健守先生幾年前話要捐錢畀大學，請大學提交建議書，中文大學劉遵義校長以學生交流為主題打動康本健守先生，於是佢捐一億元畀中大，專門資助中大學生出外交流。各位讀者如果有心捐錢畀中學、大學，不妨考慮吓資助本地生出外exchange嘅計劃。