自從06年6月港府推出優才計劃，吸引咗一批猛人變身香港人，香港嘅國際地位真係提升咗唔少。好似首個經優才計劃來港嘅內地藝術文化界鋼琴家郎朗，做咗5年香港人，前日獲英國皇家音樂學院（RoyalCollegeofMusic）頒授音樂榮譽博士學位，由英國王儲查理斯親自將博士學位證書交畀郎朗。
RCM百年來首位華人獲得
呢個榮譽有幾把閉？原來1882年創校嘅RCM，每年都會頒授對學院有傑出貢獻人士榮譽稱號，悠悠歲月，28歲嘅郎朗就係RCM史上第一位獲得該殊榮嘅中國人，仲係歷屆獲榮譽博士學位最年輕嗰個。
咁郎朗對RCM有乜貢獻？同郎朗合作多次嘅RCM鋼琴教授瓦妮莎‧拉塔奇話，郎朗舊年4月喺RCM講咗一次大師課，令學生喺音樂演奏上獲得啟發，獲益匪淺，咪頒呢個博士學位，表揚佢喺藝術、慈善、教育領域作出貢獻，同埋對年輕一代嘅廣泛影響。
郎朗獲頒博士學位後向傳媒承認，去年喺RCM教授大師課，兩個月後即收到院長嘅信，話頒博士學位畀佢，問佢會否去攞，因為呢個榮譽要求當事人親身到場。郎朗話：「我又剛好沒有演出，很高興地接受了。」佢仲講，之前獲得嘅獎項都係有關唱片、音樂上嘅榮譽，但呢個學院榮譽非常特別，對於一個彈琴嘅人，來自一所世界頂尖音樂學院嘅表彰，代表一種專業肯定，呢種感覺很不一樣。
經優才計劃來港嘅內地猛人除咗郎朗仲有唔少，鋼琴家仲有李雲迪；內地演藝人士就包括實力派演員葛優、胡軍、黃曉明、章子怡、周迅、湯唯、張靜初等；體壇名將有體操王子之稱嘅李寧、國家隊羽毛球前代表王晨同周蜜等。
