星期日捱夜睇波，英超今季全季最重要一場大戰，關乎冠軍誰屬，就是曼聯主場迎戰車路士。車仔如果贏波，雙方分數相同，餘下要看最後兩場邊個跣腳，就前功盡廢。咁緊要，車仔應該全力以赴啩？點知令人大失所望，車仔球星踢來有神冇氣，活力不足，速度欠奉，曼聯兩翼華倫西亞與朴智星已搞到車仔中場失守，後防大亂。車仔領隊安察洛堤係老經驗嘅著名教練，上季初到英倫，就帶領車仔攞冠軍，但今季唔知點解，冇晒料到，淨係睇呢場，費格遜爵士嘅排陣，戰術，賽前打氣，全部贏晒，安察洛堤好似六神無主咁，完全冇新方法去扭轉曼聯上半場領先二比零嘅局面，明明大落後，下半場仲要更換兩名防守球員，遲遲唔換出今仗冇厘用嘅卡奴，睇怕係佢自己都冇咗鬥志。
曼聯今季力壓車路士、阿仙奴、曼城、利物浦、熱刺五大球會，費格遜居功至偉，利物浦開壞頭，季初就內亂，球星與鶴臣唔夾，換過杜格利殊之後，已落後太遠；熱刺嘅龍門水皮，四位中堅輪流受傷，一早唔係冠軍相；曼城領隊文仙尼空有一堆球星，但目標太細，唔敢爭前二，只願保住第四名，對住強隊就大打防守戰，唔敢攻，無志氣到極；阿仙奴又係死在守門員與中堅，後防往往抵受不住壓力，輸畀西布朗、保頓及領先紐卡素四球而被追和，三場痛失七分，簡直莫名其妙。阿仙奴領隊雲格好則好矣，弊在迷信年青球員兼唔及早買入穩陣防守球員，全隊年青得滯，演出反覆，無法保持水準，以致時好時劣，車路士就剛好相反，球員平均年紀大，主將全部三十二歲左右，在漫長球季之中，難以保持活力，例如對曼聯呢場生死戰，竟然無法攔截華倫西亞與小扁豆。費格遜爵士就唔同，夠膽起用年青小扁豆，棄用大牌兼身價高嘅射手貝碧托夫，後防有施華兄弟，中場安達臣等年青人，同時又重用老將噃，四十歲嘅鋼門雲達沙，三十七歲嘅老來嬌傑斯，仲有最佳中堅組合費迪南與維迪，可見費格遜在經驗與活力之間，取得最佳平衡，其眼光與視野高出雲格一皮，應該係英國近三十年來最佳領隊。