若然「漏口皇帝」都無法滿足到你，咁好色《黑天鵝》又如何？今個禮拜，繼續俾奧斯卡猛片玩晒！出爐影后妮妲莉寶雯固然係焦點所在，但不可不提藍光版嘅高層次畫質，尤其當展現舞台上那件「戰衣」時，質感異常出眾，唔理係純潔嘅白天鵝，抑或充滿邪念嘅黑天鵝，視覺享受同樣豐富。
記者：陳國輝
天鵝妝網上熱播
想知道《黑天鵝》對觀眾嘅視覺衝擊有幾勁？上網一搵就知！其實，坊間唔少視頻都上載咗天鵝妝嘅化妝技巧，例如點樣畫眉、上色等，睇落非常講究。至於點先可以化到女主角個妝咁出神入化，由一位純情小女孩，搖身一變成為邪惡嘅小魔女？呢樣我真係唔識教你，不過，碟內出現過無數次有關片段，不妨參考吓。
另一視覺賣點，絕對係黑天鵝件衫！雖然佢全身黑色Look，但高清顯示之下，無論身上嘅羽毛、布料，抑或戰衣上嘅數十粒水晶，清楚分明，製作好認真，一啲都唔覺得馬虎。
黑舞台現層次
若然想測試黑色層次位，除咗女主角套「戰衣」，其實故事內仲有好多地方俾你慢慢欣賞。最明顯係當妮妲莉寶雯夜晚排舞嗰陣，由於熄晒燈環境昏黑，你不妨試吓自己部電視，睇吓有無發現練舞室入面嘅裝飾以及物品；另外，當佢由後台出場表演嗰陣，亦可留意幕後嘅黑位地方，是否清晰兼有層次。
Bonus助你解疑團
故事講啲乜？都係留番等大家買碟睇。但相信好多人睇完仍一頭霧水，究竟邊部份係真實，邊部份係女主角自己幻想？如果唔明，睇埋Bonus或者一清二楚，收錄內容包括「《黑天鵝》的蛻變」，想再深入啲，最好睇埋「角色剖析」，了解吓每個人同女主角嘅關係。當然，例牌菜好似製作花絮以及導演專訪等，都可能幫到你解答疑問。
Profile
畫面：1080p
音效：DTSHDMA5.1
特別收錄：《黑天鵝》的蛻變特輯、預告片、角色剖析、佈景及戲服設計製作特輯、導演戴倫阿羅諾夫斯基檔案等。
