金句天王黎明（Leon）噚日表現佢嘅運動細胞，同公益金董事黃永光去咗科學園附近海邊玩划艇比賽，幫公益金籌款。Leon表現風騷，仲問朋友借咗架遊艇駛去現場，方便自己上落艇，問Leon有冇諗過買遊艇？佢即刻以金句回應：「冇，借最好，有借有還，再借唔難，請番人食飯咪得。」
現場見Leon划得唔錯，仲贏埋㖭，賽前佢就隱瞞實力話：「我天份唔高，但又未去到低，起碼隻艇仲郁到。」原來Leon只係抽咗一日時間練咗六個鐘，不過佢好老實咁話：「其間唞咗四個鐘，冇可能划足六個鐘，唔係會變硬筋人。」
無懼反艇
大家都好關心Leon有冇試過反艇，點知佢話：「反唔緊要，反與唔反之間嗰種離心力最驚。」Leon又話相信唔會反艇，所以只係着運動裝上陣，唔使着泳褲打底，不過見佢揳咗條毛巾仔喺胸口，間唔中就拎出來抹汗。Leon又話：「本來傾過喺中環踩單車或者打保齡，後來我提議划艇，之前以我估隻艇係肥啲，但家呢隻又瘦又長，同之前完全唔同。」
噚日天文台發出酷熱警告，你都咪話唔辛苦，但Leon話相比喺內地拍戲要着近50磅嘅戲服，已經好好多喎，果然捱得。