煲呔看守政府又有新搞作，噚日喺佢哋自家facebook專頁「上亞厘畢道」搞咗個答問環節〈時事Q&A〉，話要透過網上直播答問，同各位進一步溝通。頭炮係噚晚「黑色星期五」首播，搵咗民政事務局副局長許曉暉，同網友大談社會企業。
50分鐘時間，許局長答咗22條問題，問題好明顯河蟹過，想搵條激啲都冇，許副局都好明顯有所準備，答問好官腔，但冇睇過貓紙，自己仲識得帶備社企製品圍巾一條、零食一樽同相簿一本到場，誠意分合格。
唔少網友話，彼此有啲互動係個好開始，希望政府日後搞多啲同類活動，同埋時間長啲，八方都希望政府下次搵孫公同李少光上網，同大家分享吓點解唔自願都照減班、向天噴胡椒噴霧心得等，肯定多好多網友畀like。