雖然中信泰富（267）小股東對榮智健嘅「貢獻」仍未釋懷，但另一邊廂榮生就繼續威。根據2011胡潤上海財富白皮書顯示，扎根香港嘅榮智健，以220億人仔身家，成為上海首富，喺全中國排名第29。
根據白皮書資料，上海係全中國第二多千萬富豪嘅地區，有成13.2萬人，當中7800人更係億萬富豪，即係話，平均每175人裏面就有一個係千萬富翁，真係行次外灘都撞到幾件。至於上海富豪榜裏面，最後生係31歲嘅姚明，佢同時亦係全國最年輕富豪。最年長係88歲嘅榮豐控股盛毓南。盛老先生何許人？曾經流傳係亞視主要投資者王征爸爸，但王征就冇正面回應。