講起chok樣，相信大家第一時間必定會想起林峯。為了迎合chok這個潮流，野仔最近的派台歌叫做《CHOK的故事》（上集），不過他們認為最chok的絕不是林峯，反而一致推舉梁朝偉才是chok中之王。野仔本月尾會開騷，他們正考慮嘉賓名單當中包括賭王千金何超瓊同埋潘霜霜，噱頭十足。
野仔最近的新歌《CHOK的故事》（上集）不期然令人聯想到林峯，他們解釋絕對與林峯冇關，反而他們想憑此歌一改「chok」的負面形象，Chris說：「唔知點解好多人覺得chok係唔好嘅嘢，其實chok又影響唔到人，只係啲甫士勁啲咁。」
封偉仔Chok王
阿占還大讚林峯專業，他透露有次邀請林峯到電台接受訪問，他沒有助手跟身，自己背着一個大袋去到電台，阿占說：「佢份人冇架子又pro，明明見佢個樣好攰，一開咪佢就好投入，到中間break佢第一時間伏喺枱度休息，一到番節目時間個人即時醒番，我估呢種專業係喺TVB長期拍劇嘅藝人先會有，而且我覺得佢係靚仔，唔係chok。」
雖然大部份人都覺得林峯是目前最chok的藝人，不過阿銘、Pong及Wilson都一致認為梁朝偉才是始祖，Pong說：「佢嗰種chok有邊個女仔唔俾佢電暈o架，男人都覺得佢型爆啦，佢不論做戲定係平時行街俾記者影到，都係keep住chok樣o架。」
搞騷多花臣
此外小胡透露《CHOK的故事》會有下集，他表示：「chok呢個話題真係有排講，一首歌寫唔晒落去，所以咪有下集。」另外，阿占表示野仔本月28日則在九展舉行音樂會，野仔打破傳統，在音樂會上加插fashionshow，希望到時fans可以chok住睇騷，現時他們正考慮嘉賓名單，他笑言：「呢排興超雲、超蓮，反而我哋想請超瓊嚟，仲有想請埋潘霜霜。」
採訪：李珮洳
攝影：黃文偉
