基斯坦奴朗拿度（C朗）同卡卡上季一先一後加盟皇家馬德里，一心為球隊打造成新一代銀河艦隊，點知兩季以嚟只係贏咗一個西班牙盃咁大把。睇番兩人喺皇馬嘅前途，C朗就得到隊友讓路，近期入波入到腳軟；卡卡就連後備都冇份踢，連阿媽都預言來季會搬到倫敦，睇怕要跟番舊教練安察洛堤先可以翻生。
西甲入36球拋離美斯
講真，皇馬要喺西甲追巴塞就冇咩希望，但如果造就C朗壓過美斯成為神射手，都叫做攞番尾彩；C朗上仗對西維爾已經食出「大四喜」，今次主場對基達菲就食出「大三元」，個人演帽子戲法，聯賽總入球多美斯5球咁多（未計周三戰果）。
講番呢場皇馬4:0大勝基達菲，C朗真係要請隊友奧斯爾食飯；事關第1、2個入球，都係奧斯爾助攻，尤其第2球仲係有空門都唔射，橫傳畀C朗射空門。賓施馬入到第3球後，基本上基達菲都任人魚肉；到補時階段，C朗12碼埋齋，兩場波入7球。
上季以8,000萬鎊從曼聯加盟，C朗一直係皇馬天之驕子，今次更有隊友「群星拱照」，慌死佢冇波入；但同季從AC加盟嘅卡卡就慘變邊緣人，呢場波連後備都冇。卡卡母親仲喺twitter爆響口，話佢哋全家今年8月就會由馬德里搬到倫敦，暗示卡卡會轉投車路士。
卡卡下一站：車仔？
皇馬已經簽入多蒙特中場紐尼沙軒，同位置仲有奧斯爾，卡卡轉投車路士重返安察洛堤懷抱，都好順利成章；事關兩人合作幫AC贏07年歐聯，都好想重溫舊夢。不過肥安本身位置都唔穩，最近就傳車仔想搵蘇拿接任，萬一卡卡嚟到，肥安走人，就真係搞笑喇！