李詩韻同公益金主席吳守基等人，會喺《萬眾同心公益金》一齊表演跳舞，李詩韻同吳主席係一對，噚日佢兩個喺電視城進行第二次練習，仲即場表演咗一段舞，吳主席雙手舉起李詩韻到半空，就好似做緊挺舉咁，事後李詩韻話：「都未試過喺男人頭上面擘髀，自己真係幾保守，到時正式表演仲要着住裙，真係唔係咁習慣。」