公眾假期中、上環大撤退，八方噚日卻喺信德中心見到好多老友，仲齊人過平時，皆因「蛇竇」蘭芳園又開新舖。第二代揸fit人林俊業話，大半年前熟客、賭王千金何超遐問佢有冇興趣上信德開舖，佢見尖沙嘴間分店上軌道，趁老竇林木河創辦嘅蘭芳園今年９月60周年，一於再下一城。
做埋燒味同潮州打冷
信德蘭芳園噚日開張，絲襪奶茶、撈丁、豬扒包呢啲台柱一應俱全，咁新舖點都要有啲新意思先得，佢同八方講，最新引入迷你熱狗，條腸仔係荷蘭貨，包由嘉頓供應，好鬆軟。蘭芳園新舖除咗傳統茶記食品，仲有廣東燒味同潮州打冷；林俊業話燒味師傅由大酒店燒味部挖角，佢對出品有信心。
至於晚市做埋打冷，林俊業話因為佢哋係潮州人，平日成家人食飯都係食潮州菜，阿爸最鍾意，因此開新舖就做埋打冷，第日一家人就有個「私家」飯堂。佢話主理打冷個師傅成70歲，有幾十年經驗，應該係「全港最好三個打冷師傅之一」咁話。八方試食幾件鵝片，滷水味醇厚、鵝肉冇渣，可以。之不過中環人幫襯蘭芳園，主要都係想飲奶茶，打冷、燒味只係配菜，其他地方都有得食，林俊業話知道熟客有要求，因此新舖開張前，特別安排老店師傅訓練新人，保證奶茶味道始終如一，又買咗部幾萬蚊急凍機將熱茶急凍，凍奶茶可以加少啲冰都保證夠凍。
賣奶茶、咖啡響朵，煮撈丁耍家，八方長年幫襯，睇見蘭芳園家陣「發」大嚟做，固然戥林伯高興，不過坐喺新舖入面，杯奶茶飲落卻好似同坐喺街邊檔飲有啲唔同，茶葉、冲茶手勢即使一成不變，嗰種氣氛都唔同晒咯。
mailto:[email protected]
