杜琪峯（杜Sir）前晚啟程出發到康城做第64屆康城影展的評審，由於將會與主席評審羅拔迪尼路碰面，故杜Sir心情靚爆，又大讚鄭秀文（Sammi）是她最愛的女演員，更出動追殺令嚴禁許志安飛甩Sammi，並揚言：「如果安仔揼咗佢，我斬佢老母十碌。」
第64屆康城影展今日舉行，有份擔任評審的杜琪峯前晚與太太出發到康城，心情靚爆的杜Sir坦言十分開心，因為今次評審主席是國際巨星羅拔迪尼路（RobertDeNiro），他自言到時要問羅拔迪尼路是否他邀請自己做評審，他說：「佢豐功偉績，又拍咁多電影，又做導演，係呢10幾年內最出色嘅演員，真係好難得。」
雷凱欣鬼祟入閘
今次杜Sir將逗留當地十多天，自言會趁此行學習睇戲，他執導的電影《高海拔之戀II》也將暫停拍攝，主角鄭秀文（Sammi）和古天樂可爭取時間休息。杜Sir卻踢爆拍攝時Sammi不肯進食，他說：「拍得好辛苦，叫極都唔肯食，要喺地中海搵啲蝦畀佢打邊爐，因為啲戲服有四、五層，佢怕肥，Sammi演技唔叻，但佢係好努力為部戲嘅演員。」
對於Sammi和許志安復合，杜Sir舉腳贊成，催促兩人早日生仔，更指上帝會祝福Sammi，並揚言：「Sammi因為有上帝，如果唔係佢死咗。如果安仔揼咗佢，我斬佢老母十碌，Sammi係我最愛嘅女演員。」
因不堪壓力而爆煲的雷凱欣前晚低調現身機場出發到康城，但她卻見光即閃，以一身黑衣鬼祟入閘，成功避過記者拍照，宣傳人員想聯絡她，她也避聽電話。
范冰冰素顏現身
此外，內地影星范冰冰昨日凌晨從北京出發到康城，素顏出現的她一臉倦容，雖然同行只得兩名男助理，但現場所見范冰冰帶了很多行李，相信到時她將以最佳狀態示人。
採訪：溫敏芝
攝影：黃偉雄
