Exige肇慶激劈　輕上200

Exige肇慶激劈　輕上200

又倫敦的士又通宵賣車，富利堡老闆一向諗頭多多，最近染上賽車癮，索性吹雞搞隊蓮花車隊，拉晒十幾架最辣最癲嘅蓮花Exige，遠走肇慶同場較技，連少見嘅2Eleven同Evora都嚟湊熱鬧，可算百花齊放！

記者：徐影龍
攝影：林栢鈞

車輕偈勁全場飛

珠海賽車場已被港人玩到厭，近年轉陣至剛落成嘅肇慶賽車場。富記唔係第一次搞TrackDay，過往以戰神GT-R為主，蓮花Only係第一次。今次咁大陣仗遠赴肇慶賽車場，更請埋Lotus英國車手及工程師同行，就係為咗提升香港蓮花車隊嘅技術，準備今年落澳門一拼。A、B組加埋有成十幾架蓮花，數量最多係Exige，另外仲有無頂2Eleven同最新嘅百萬辣跑Evora，喺富記車庫都未見過咁多蓮花拍埋一齊，場面都幾壯觀。
Exige喺其他TrackDay已有不俗成績，贏過唔少名門超跑，嚟到肇慶賽車場，更因車身夠輕同操控特性，應付急彎反而比好多四驅Turbo車更利落。現場睇住一堆Lotus狂飛，入彎時響胎尖叫後極速出彎，你會發覺，Lotus喺香港跑真係有啲嘥。

■Miles服務過舒密加車隊，係蓮花車隊軍師之一。

■除咗港聞同財經版，以後好有機會喺體育版見埋EricWong。

■側晒身甩甩哋入彎，反而令Exige比四驅車更靈活。

■睽違已久嘅2Eleven，鋸埋車頂好有型。

■現場一紅一藍兩架百萬蓮花Evora，爆直路時快得好誇張。

西裝友變賽車手

走到咁遠搞TrackDay，除咗打響蓮花賽車形象外，最重要係富記老闆EricWong，近年忽然愛上賽車運動。呢位喺港聞同財經版經常曝光嘅西裝生意人，唔係玩玩吓搞Gimmick，認真地四出拜師學藝狂操車，由四個月前圈速1分42秒，到今日最快做到1分29秒，鬥開車都知，圈速進步的確好大，就連服務過舒密加車隊嘅教練Miles，都讚佢好有潛質做賽車手。
由於成個場都係富記包晒，買齊保險同落Track費，令我有機會坐上Evora，落場體驗肇慶賽車場嘅恐怖髮夾彎。跟齋睇完全兩回事，實際跑過先知難度有幾高，東西兩邊彎道相當密集，尤其T6同T7兩個接連180度髮夾彎，好多車手就係車速唔啱，最常炒出界食「蜜提沙」。兩條近500米嘅大直路亦好刺激，五波可踩過200km/h，入彎前BrakePoint要得準，否則又出界收場。實地試過先知，圈速快1秒難度有幾高，亦令我更佩服Eric嘅決心。

■Miles喺每個彎做晒記錄，呢份天書好值錢。

■落場走轉發覺肇慶賽車場難度高，尤其連續髮夾彎。

■EricWong最自豪偷輕車身外，戰車近乎零改裝。