早排又違反交通條例被票控兼罰款嘅謝天華，噚日喺中環拍新劇《潛行狙擊》，吸引到30幾位途人圍觀。天華雖然又惹官非，但噚日見佢嘅心情都冇乜受影響，個樣依舊同佢喺《洪武三十二》嘅演出一樣，chok過不停，連路經嘅馮仁昭都差啲俾佢chok親。
被打10次
噚日嘅戲份講着到西裝骨骨嘅天華喺巷仔俾人擦鞋，點知就俾另一演員用摺凳伏擊，仲打到佢頭破血流。天華拍攝時都幾辛苦，唔知對手係咪緊張得滯，表現唔太理想，一係就拎摺凳時甩手，一係就打落去時唔夠順暢，計埋NG咗10次，天華就係咁俾人打咗10次。
雖然不停被打，但天華冇黑面，身為前輩嘅佢仲為對手親身示範點樣擸凳同打落去，最後對手經天華教路後果然一take搞掂。之後化咗個爆缸妝嘅天華chok樣不減，引嚟好多圍觀途人叫佢望鏡頭影相，而天華都有求必應，到啲市民鬼咁開心！