邊個夠我勁？我求大俠講嘅係利物浦。紅軍周一憑麥斯洛迪古斯（前）連中三元，古積特同蘇亞雷斯各建一功，5:2大炒富咸，壓過熱刺升上英超第5（未計周二戰果），踢下屆歐霸盃真係越嚟越似層層。紅軍近嚟踢得咁好，連幾可肯定紀錄性19奪英格蘭頂級聯賽錦標嘅曼聯都企埋一邊，因為單計近14場聯賽，紅軍10勝2和2負，而紅魔只得9勝1和4負咋！紅軍踢得咁好，最大功臣梗係麥斯洛迪古斯啦，呢名阿根廷翼鋒腳風順到你唔信，今次已係佢近3場第2次連中三元，難怪賽後獲領隊杜格利殊盛讚啦！紅軍個勢咁好，連養緊傷嘅隊長謝拉特都豪氣咁話，有信心球隊可以喺紅魔手中，攞番個英頂級聯賽奪標最多紀錄返嚟。