曼聯球迷最唔想見到嘅嘢，終於發生！究竟係乜？之唔係俾「烏鴉口」比利「點燈」囉！出名捧邊隊死邊隊嘅比利，日前大讚曼聯嘅墨西哥前鋒查維亞靴南迪斯係下一個美斯，月尾會同紅魔爭歐聯嘅巴塞隆拿，聽到比利咁講，仲唔掩住半邊嘴偷笑？
22歲嘅「小豆」由墨西哥球會瓜達拉哈拉加盟曼聯，估唔到咁快茁壯成長，表現好到你唔信；迄今幫紅魔入咗20球，喺禮拜日贏車仔2:1場英超關鍵戰，開波37秒就入波。「小豆」表現咁好，自然成為全球焦點，就連球王比利亦出嚟抽水。
讚小豆係下一個美斯
比利話：「我喺電視睇過佢踢波，真係好得。佢同山齊士（墨西哥名宿）一樣可以帶畀球迷驚喜，因為佢有能力入好多波；仲好有天份，有可能成為下一個美斯。」
家陣經已70歲嘅比利，球員時代幫巴西贏過3次世盃，「小豆」俾佢點名稱讚，本來應該好開心；問題係比利出名超級「烏鴉口」，捧邊個衰邊個。之前佢測預前熱刺中場班比會成為世界級球員，結果班比只係幫英格蘭踢過23場國際賽，一次世盃都未打過。
另外，佢94年睇好哥倫比亞可以贏世盃，最終哥軍分組賽出局，陣中主力守將艾斯谷巴之後仲被槍殺；98世盃佢又貼死西班牙，4年後喺02世盃估法國同阿根廷齊入決賽，兩隊就分組賽止步。
「小豆」係曼聯喺歐聯嘅主力兼首席射手，本月28日喺溫布萊鬥巴塞都靠晒佢；家陣佢俾比利「點燈」，最開心嗰個肯定係巴塞教練哥迪奧拿。雖然係咁，曼聯領隊費格遜一如少理，仲話搵到對付巴塞嘅辦法，就係同佢哋死過，鬥攻！費Sir咁話：「我哋有班好勁嘅攻擊球員，希望佢哋可以為巴塞製造麻煩啦！」我求大俠都希望比利把「烏鴉口」今次唔中，如果唔係，月尾邊有好波睇呀？
曼城累紅魔封王冇盃捧
另外，由於曼城有可能喺周六捧英足盃，英超賽會為免曼城同曼聯球迷同日在市內慶祝起衝突，決定就算曼聯喺周六較早時（早場作客布力般流浪只要攞1分）落實贏英超，都唔會頒個盃畀佢哋。換言之，曼聯即使提早封王，都要等到英超煞科日迎黑池後先有得慶祝。