中環老字號蘭芳園信德新舖開幕，噚日傍晚搞咗個「自己友party」，有200個熟客捧場，老闆之一林俊業滿場飛，新世界彤叔孻子鄭家成都有現身，八方鄰居尊子一家三口都嚟試新菜，囝囝「牛王頭」食得津津有味。
捐賀禮畀東華
名醫莫樹錦同女友孖咇出現，佢係蘭芳園絲襪奶茶粉絲，「行開尖沙嘴、中環想飲杯奶茶，好自然走去」。佢話唔擔心分店食物質素：「我對『業仔』維持水準有好高盼望，佢哋撈丁一直整得好好，又好innovative，所以好有期望。」
不甘做「車衣女工」而離開TVB嘅前主播柳俊江，與太太都係蘭芳園擁躉，「每個禮拜都會去尖沙嘴分店，最鍾意食撈丁同飲奶茶」。柳爺係潮州人，蘭芳園做埋打冷，啱晒佢。據林俊業講，今次開新舖冇事先張揚，免得老友破費送花籃，不過噚日現場所見都有十幾廿個花籃，林俊業又放咗個籌款箱喺舖頭，呼籲老友將賀禮捐畀東華三院，好多人響應佢呼籲，將賀禮行善。