家幾乎人人有部iPhone傍身，隨時拍片，唔係邊有咁多阿叔阿姐開拖嘅YouTube片流芳百世?其實識得玩，iPhone都可以拍戲，唔少配件生產商已經幫佢小事化大，出埋穩定器同換鏡Mount，拍出嚟自然更有電影感！
記者：王震遠
攝影：梁細權、伍慶泉
Model：Monnie,Kitterick@FameEntertainment
單薄iPhone易手震
近年唔少人轉行玩拍片，玩落就知道有手震嘅問題出現。平時企定定已經好難揸得定，行緊路拍嘢更加會震過貓王！加上iPhone4機身太輕又唔易揸，仲要無得落腳架，手震效果特別嚴重。喺電影世界有著名穩定器Steadicam幫手穩定畫面，唔少電影製作亦用過呢件工具，iPhone世界亦有別注版本SteadicamSmoothee。
荷李活級技術
SteadicamSmoothee由美國著名相機器材生產商製造，原理與Steadicam相同，即係荷李活電影同美國電視台都用嘅技術，家連iPhone都用到。呢支穩定器上方設有轉接架，可以安裝iPhone4、iPhone3GS、iPodTouch同部份拍攝器材；中部有調節掣，用嚟將穩定器調節到水平；下方有手柄同重件，令穩定器保持重心向下，令畫面更流暢。
試過安裝SteadicamSmoothee後再用iPhone拍片，左右移動時畫面都唔會太震，穩定咗好多，前行同後退無晒突兀嘅震盪感，成個感覺好流暢。特別邊係行邊拍嘅時候，平時已經震到主角都出晒鏡，質素難接受，家有明顯改善，好似有油壓咁識得自動修正，拍出嚟真係幾有電影感。
照相館（27220068）
iPhone駁Canon鏡
iPhone4鏡頭焦距約33-34mm，固定F2.4光圈，無得揀。坊間雖有不少塑膠鏡頭選擇，但有專業廠商就製作出一套iPhone轉換Canon鏡頭組合。此組合由一個鐵殼同轉接筒組成，只要插上iPhone4機身就可以換上其他魚眼、遠近鏡等鏡頭，仲可以落埋腳架。如想轉用Canon單反鏡，就要再加多個Mount，拍片時影像會投射喺內置嘅對焦鏡片上，畫面會上下倒轉。多咗咁多專業鏡，突破晒iPhone局限，以後拍乜都得！
112相機配件（23886879）
App戲法
拍粵語殘片
若果鍾意Vintage味濃嘅影片，呢個App就啱晒你。顧名思義可以扮拍出8mm電影質感，有Siena、黑白、70年代等濾鏡選擇，仲可以揀鏡頭！雖然拍唔到720p高清質素，但勝在夠玩味，膠片感十足，真係拍番套粵語殘片都得！
自導自剪
家唔須要再用電腦或iMovie，只要用著名短片上載網Vimeo推出嘅同名App，就可以用手機直接剪！專為拍攝發燒友而設嘅Vimeo，既可以當佢係網上電影發行商，幫你將套戲揚威海外，仲可以做到簡單影片製作。用iPhone剪番720p短片好順暢，仲方便到可以直接Upload上Vimeo網站，網上導演必備。
數碼變焦
iPhone4內置鏡頭本來無光學變焦功能，雖然影相可以數碼Zoominout，但拍片友就無呢個福份。《VideoZoom2》嘅出現就解決咗呢個問題，最高可以支援到3倍光學變焦，但係變焦效果未算好流暢，亦無得慢慢咁拉Wide同Zoom近，希望遲吓會有改良版本啦！
原罪大導韓Phone開戲
因《原罪犯》而成名嘅導演朴贊郁，今年同弟弟合作，破格選擇用iPhone4拍攝咗一套30分鐘嘅電影《Paranmanjang》。雖然朴大導用咗10日時間同80人攝製團隊咁多資源進行拍攝，但始終肯定咗iPhone4拍攝嘅質素，證明用佢嚟自己開戲亦唔係無可能。
30部iPhone拍MV
開戲都無問題，拍MV當然唔係難事。台灣出名多諗頭嘅組合「自由發揮」，早前就採用iPhone4為新歌《姊姊》拍攝MV，一次過動用30部手機進行錄影，呢個大製作仲成為台灣首個用iPhone4拍攝嘅MV。
