內房老闆華遠集團總裁任志強,近期俾三級片男星徐錦江睇中。唔好誤會,徐錦江只係睇中有「任大炮」稱號嘅任志強一向有嗰句講嗰句,不平則鳴。皆因徐錦江喺北京買咗層漏水樓,要搵任大炮伸寃。
買咗漏水樓搵任大炮幫手
徐錦江原本喺香港拍三級片,好似《滿清十大酷刑》、《玉蒲團之官人我要》等,近年轉戰內地,做大俠搵人仔。兩年前喺北京懷柔區以逾600萬人仔,買咗幢別墅,近期收樓,點知就出現成籮問題。除咗天花漏水,牆身同玻璃仲有裂紋,話晒層樓成600幾萬,呢啲質素當然唔可以接受,所以搵發展商理論,點知得到嘅答案係「已經達國家標準」。
前日徐大俠就喺微博向任大炮留言,「任總您好,我是香港演員徐錦江,在北京買了一套房子,樓頂多處漏水,開發商說他們已經達到國家的交房標準,請教任總,謝謝!」仲貼埋天花板滲水相。
單睇留言,一定以為徐大俠買嗰層樓,係任志強旗下樓盤,貨不對辦所以就透過微博投訴。錯!徐大俠間屋係內地其他發展商嘅出品。咁點解要搵任志強伸寃呢?徐錦江話,見任志強平日總會替人抱打不平,所以搵佢幫吓手,實行上演現代版包青天。
呢招曲線伸寃,就算任大炮幫唔到手,都引起傳媒注意。又一次證明,「脫星」都係有腦嘅!
李華華
mailto:[email protected]