菲律賓人質慘劇後，港府派出醫療專家越洋救人，事隔大半年，醫管局論功行賞，其中拍板將頭部受重創命懸一線嘅Jason送返香港、屯門醫院腦外科主管方道生醫生，獲今年醫管局傑出員工獎。目前Jason慢慢康復，方醫生同佢隊team應記一功。
成team人默默耕耘
在人質事件中受重傷嘅Jason，喺馬尼拉陷入深度昏迷，要決定留佢在菲律賓度過危險期，抑或送返港做手術，當時真係兩難，後來方醫生飛到當地，決定帶Jason返香港，由佢全程護送，結果安全抵埗直入手術室。呢一幕勇救Jason場面，幾百萬香港人記憶猶新。
醫管局後日舉行傑出員工頒獎禮，據講獲獎醫護人員或團隊，各有獎牌、金章同10,000元現金獎。同其他市區大醫院比較，屯門醫院出名冇錢資源少，難得方醫生一直在屯門做咗廿年，同成team腦外科專家默默耕耘，搞咗個導航系統腦外科手術室。之前有人質疑點解要將Jason送到屯門醫院，今次方道生獲獎，顯示出乜嘢先係救人最重要因素。
唔投私人市場搵錢
方醫生係公院入面最資深嘅腦外科權威之一，年薪大約200萬元，有醫生指腦外科專家喺私人市場好吃香，處理中風、腦神經瘤以至脊椎神經手術，金刀一揮「錢」途絕對無限，方道生留在公立醫院，追求嘅應該唔可以一個傑出員工獎嚟衡量。
被形容低調、實幹嘅方道生最近比較活躍，參加醫務委員會選舉，同醫學會副會長陳以誠角逐因沈祖堯做咗中大校長之後嘅懸空席位，醫委會正點票，邊位勝出好快就知。而政府正計劃喺啟德興建卓越腦科中心，八方希望屆時方醫生可以大展身手。
mailto:[email protected]