前日出席中環ifc舉行嘅母親節活動嘅Angelababy（楊穎），開晒口話會買禮物送畀男友黃曉明嘅媽咪，結果佢做完嘢之後真係走咗去行街揀禮物，只可惜Baby揀嚟揀去都未揀啱心水。
黃曉明為母洗腳
前日下晝5點，Baby出席完活動之後，挽住個粉紅色Hermès手袋同助手、經理人阿Kim以及阿Kim囡囡一行四人走去中環間Pradashopping。Baby入到舖頭之後即刻攞起個粉紅色手袋左拼右拼，似乎對粉紅色情有獨鍾。研究完一輪之後，Baby最終都放低個粉紅色袋，然後攞起另一個深色嘅手挽袋又係左照右照，由於Baby話過會送禮物冧黃曉明媽咪，呢個深色袋好可能係揀畀伯母都唔定。睇完手袋之後，Baby又轉戰鬆糕鞋，揀咗幾個唔同款試完再試。不過，Baby喺舖頭揀咗成20分鐘都未揀啱心水，最後都係兩手空空離開。
之後Baby同助手等人坐七人車去銅鑼灣，起初以為佢哋去開餐，但原來Baby只係叫助手幫佢買外賣，然後再同經理人去貝沙灣開party。
另外，黃曉明前日喺網上呼籲fans喺母親節當日向媽咪送暖，鼓勵佢哋為媽咪洗腳，體味母愛；而佢甚至送埋洗腳盆畀粉絲同工作人員，等佢哋一盡孝道。