「關愛基金」成立之初，雷聲甚大，點知俾議員、傳媒炮轟幾輪之下，雷聲不再，雨點更少，到如今距離籌款五十億之目標好遠，得私人捐款承諾十幾億，仲水皮過香港大學籌款，以後要辦落去嘅話，只能靠政府撥款五十億元，但各派議員各懷鬼胎，明落曾蔭權面子，暗地裏令負責關愛基金事宜嘅唐英年難堪。要記住，放完暑假就正式部署明年特首選舉喇，大熱門人馬唐司長冇咁容易直趨終點嘅，不少人想佢騎馬不穩o架，當初有人天真地以為搵唐司長做「關愛基金」主席，係明益佢，為佢造勢，依家睇清楚啦，係俾個大包袱佢至真。
唔講「關愛基金」政治，單講其撥款用途，亦有人發炮攻擊，包括教育界張文光議員在內，可見好多人為罵而罵，冇乜詳細思考。撥款資助清貧學生出外遊學，一定係有好過冇，張文光議員唔好唱高調去反對，為反而反。有云讀萬卷書，不如行萬里路，或嫌誇張，但出外一行可擴闊視野，絕對無錯。左丁山成世人第一次坐飛機，就係僥倖得到獎學金去讀碩士之時，去到啟德機場，成個大鄉里咁，上到飛機，既興奮又緊張。到咗外地讀書，方知道經濟發展不是坐在海運中心飲咖啡，而係活生生見到大量農民入城搵工做之實況，對個人思維刺激甚大。
學生Y有生性老竇，可以支持佢往外國交換近半年，佢最初係大香港主義，迷戀香港，幾唔願意，在父母催迫之下先至搭上尾班車。好嘞，眨吓眼已要返嚟香港，佢在fb留言，在外大開眼界，知道講英文唔係以示高級，而係溝通必需工具。了解中外學生在文化上好難融合，能夠從各方面思考問題。好吖，在外國短短四個半月，學生Y之思想面貌已有積極改變，遊學確係有用嘅，香港要長遠維持競爭力（中國社會科學院話香港競爭能量減弱），香港學生一定要更多國際視野。「關愛基金」資助窮學生外遊，先勿論日期長短，總之出外一轉總好過唔出外，反對此議嘅，視野未免太短太窄。