佛誕假前夕中環籠罩放假氣氛，中環老友噚日下午無事忙，約八方到灣仔食晏，地點係福臨門──後面譚臣道，嗰間昌記。灣仔上班族幫襯昌記多年，係警察總部阿Sir「飯堂」之一，亦係唔少中環人bestkeptsecret，搭幾個站「叮叮」嚟食秘製海南咖喱豬扒飯，值回票價。老友咁神心，原來噚日係昌記lastday，老闆娘梁太通知新知舊雨來講再見。
新聞小花都去開飯
昌記咖喱豬扒飯一大碟都係36蚊，八方飽食之際，見到有客人拎住相機影相，連太子女都影埋一份，話要留念喎。老闆娘梁太話結業因為新業主狂加租，月租由2.1萬元加到7.1萬元，真係頂唔住，惟有拉閘。
梁太原來在北角做食肆，6年幾前搬到灣仔，每日朝早買早餐外賣長龍係灣仔一景，中、上環返工嘅西裝友同OL都慕名而至，據說唔少新聞主播小花都成日嚟開飯，必食海南咖喱飯，可惜梁太堅拒公開秘方。
有指新業主高價買呢個舖位，梁太話預咗會被狂加租，只係冇諗過加咁多：「我得六張枱，你叫我點畀7萬蚊租？」由於未搵到心水舖位，惟有收爐。八方打聽過行情，同街食肆租金一般要幾萬蚊，不過昌記舖仔僅200幾呎要逾7萬蚊租，真係幾誇張。
食客黃先生搭訕話呢啲家庭式經營茶餐廳，老闆搵埋都唔夠交租啦，慨嘆小生意被超貴租金扼殺。
梁太聽完一臉神傷，叫八方留低email，日後搵到新舖，江湖再見。
