楊天經終於結婚了！昨日天經跟拍拖3年的女朋友吳文珊在金鐘婚姻註冊處完婚，陳寶珠在註冊儀式期間感動得熱淚盈眶。天經婚後堅決跟母親同住，寶珠姐說：「奶奶唔好敦起個款，做新抱又唔好恃住有個老公喺度，開開心心就得喇。」
陳寶珠獨子楊天經一直在母蔭之下成長，36歲的天經終於長大成人喇！昨日在母親陳寶珠和半百親友陳寶儀、羅苡之等見證下，跟拍拖3年、比他年長兩歲從事酒店業工作的女朋友吳文珊，正式成為合法夫妻。天經表示註冊結婚籌備了個多月，明年才會擺酒宴請朋友，他說：「我之前都好緊張，成個人硬晒，估唔到個誓詞會難讀過台詞，係交換戒指嗰時我都好感動，不過都唔夠媽咪感動，我睇到阿媽感動到喊。」
適當時候避開
陳寶珠愛子如命，愛兒結婚了，她同樣非常緊張，據知監禮人請新郎新娘起身的時候，寶珠姐一樣彈起身，十分搞笑。寶珠姐在註冊時感動落淚，她說：「我都唔知幾時喊出來，佢係不期然咁流出來。」新奶奶送了一對手錶、鑽飾和金飾給一對新人，不知有沒有包括家傳之寶？寶珠姐說：「我冇家傳之寶，我咪家傳之寶囉！」新奶奶表示不會給壓力新抱，一切順其自然，寶珠姐說：「畀時間佢兩個過吓二人世界先喇！我好識做o架，好識適當時候避開。」
楊天經婚後，堅決與母親同住，寶珠姐說：「之前佢都係咁講，我都話到時先算，咁婆婆走咗，佢更堅決要一齊住。」寶珠姐大讚新抱容易相處，不怕相見好同住難，她說：「呢個時代只要大家體諒大家，奶奶唔好敦起個款，做新抱又唔好恃住有個老公喺度，大家開開心心就得喇！」
陳寶儀平淡是福
寶珠姐妹夫羅樂林因工作未能出席，陳寶儀對於有報道指她跟羅樂林的夫妻關係名存實亡，她表示二人仍然是夫婦關係，她說：「問題係睇點睇，我哋相處得OK，都咁多年，大家係親人，朋友，唔通呢個年紀仲攬頭攬頸，平淡係福，總之小朋友開心，我哋冇問題！」
採訪：楊潔雯
攝影：彭琮然