有報道話近年戰績甚差嘅中國女排在四月二十六日至五月一日集訓期間，球員不斷學習，背誦毛澤東詩詞，學習長征精神，提高備戰倫敦奧運嘅情緒。
學毛詩打排球？要背誦「長征」喎，究竟係乜東東？拿出已故舊同事劉濟昆編輯嘅「毛澤東詩詞全集」（一九九○年七月版），第61頁就有呢首詩，寫於一九三五年十月：「紅軍不怕遠征難，萬水千山只等閑。五嶺逶迤騰細浪，烏蒙磅礡走泥丸。金沙水拍雲崖暖，大渡橋橫鐵索寒。更喜岷山千里雪，三軍過後盡開顏。」
據劉濟昆註解，中共紅軍在一九三四年十月，從江西、福建向陝東作戰略轉移，到一九三五年十月到達目的地，毛澤東十分自豪，寫下此詩。三軍不是海陸空三軍而是一方面軍，二方面軍與四方面軍。
唸詩呢首詩就會有一不怕苦，二不怕死嘅精神，誓死出征倫敦奧運，奪得女排金牌？實在匪夷所思，好驚內地捲起一股文革時高舉小紅書（毛澤東語錄）嘅風氣。中國女排與其讀毛語，不如腳踏實地去苦練又苦練。上個周末，拉斯維加斯有一場備受矚目嘅拳賽，就係次中量級（welterweight）拳王MannyPacquiao大戰ShaneMosley，以壓倒性點數取勝。呢位菲律賓打拳天才據說天生異稟，處休息狀態時，心臟跳動只係每分鐘42次，在極高活動狀態時，就高達205次。但佢唔係打天才嘅噃，平時聘有教練與體能訓練師，催谷身體狀態，每日早起跑山，只有佢隻狗先至可以追得貼，中午就練拳與拳手對打十二回合，之後就做無數次體操，一日做二千次situp，與教練練習揮拳十五回合，日日如是，幾乎從不間斷，另外佢又做舉重呢，按營養餐單進食呢，總之一切訓練極度刻苦與科學化，邊度會有時間去背誦甚麼語錄吖，呢位先生今年已三十二歲，打遍天下無敵手，係菲律賓國家英雄。唉，中國人好似唔係幾睇好菲律賓嘅噃，但一個以毛詩訓練運動員嘅國家，你以為會受外國人睇好咩。Pacquiao好崇拜一位中國人o架，就係自小睇李小龍電影，最鍾意「龍爭虎鬥」，以李小龍之跳跳紮「腳法」為學習對象，故此在擂台上左右前後移動似蝴蝶，外國記者問佢嘅打拳風格，佢回答：「BruceLee！」中國女排不如一樣學習李小龍啦！