有錢男人唔玩車，會被豬朋狗友話不懂生活品味，不過換轉係二世祖同樣唔玩車，就會被人讚乖仔夠踏實。今時今日呢類乖仔幾乎絕種，咁好彩我搵到個，佢就係新進唱作人王梓軒，不過見面後就真係唔多好彩，與他經歷了一個驚心動魄的中午，皆因他的左傾駕駛技術令我抹上幾把汗！
記者：趙慧敏
攝影：王文忠
髮型：MaggieLaw@kimrobinson
化妝：TKLeung@BeautyTech
服裝：7forallmankind
左軚惹的禍
甫上車廂，梓軒就如好學的小朋友，逐一了解各操控按鈕，準備好就出發！唔知係咪少揸右軚車，第一個路口轉彎，已經駛到對行線，好彩無乜車，嚇到標汗！如果揸車習慣代表性格，我想梓軒必定屬於步步為營的一類，以學神速度行駛，我以為大安旨意坐車，不過可能又是左軚惹的禍，習慣揸左軚的梓軒，總是無意中將車駛向左邊。見到路邊泊咗唔少車，好驚來個連環側掃，第二把汗又滴出來，我立即師傅上身：「睇住，唔好傾左要挨右！」終於完成圍繞將軍澳工業邨的「壯舉」，平平安安落車舒口氣。
在美穿州過省
出名有個富爸爸，曾到美國留學，玩車似乎是指定嗜好，所以相約梓軒做有關汽車訪問，便自作聰明為他找了一輛AudiS5Sportback，外表斯文，內裏狂野，我認為與他襯到絕！但結果充滿意外！見到面梓軒劈頭就表明：「老實講，我真係好耐無揸車，一陣可唔可以慢慢揸呀！」「吓，喺美國揸慣車穿州過省都要慢慢揸，你太謙！」換來他尷尬的笑容：「唔係呀，真係好耐無揸，喺美國都係黐同學車坐，自己都好少揸車。」見你咁誠懇，唔多似講假喎！就貪將軍澳工業邨人少少，先走一轉啦！
死過翻生
雖然梓軒的唱片都以「超越」為主題，例如超越聲音及超越格式等，但揸車就不會以超越為目標，「我揸車為代步，飆車開快車唔啱我。」咁係咪以前揸車發生過啲驚險事，令你有陰影？「唔可以話有陰影，不過都係死過翻生！」咁嚴重？「喺美國讀書時，同六個合唱團同學租車揸到另一個省做表演，當然輪流揸，輪到我揸時個人已經攰，反應有啲遲鈍，當然想加速Cut線，唔知點解竟然踩咗Brake，拖慢咗架車，後面有架大貨車駛至，好彩佢響按整醒我先無事。不過故事仲未完，事發後想入附近油站定驚，點知踩Brake變咗踩油門，一個急彎加速，成架車嚴重傾側，差啲反車。停車後發現自己標了一身冷汗，最後成程都做乘客呢！」
AudiS5Sportback3.0
引擎：2,995cc
馬力：333bhp/5,500-7,000rpm
扭力：440Nm/2,900-5,300rpm
傳動：7速STronic自動波箱
售價：$826,014
查詢：25281862（合迪汽車）
