艾未未人間蒸發超過一個月，唔少市民都激鬼氣，包括著名政治漫畫家尊子。尊子噚日獲邀去旺角行人專用區，即席揮毫幫市民畫頭像。今次尊子嘅作品好特別，無論畫男定女，最終都會滿面鬍鬚，因為尊子想表達「人人都是艾未未」嘅訊息。尊子由下晝四點畫到六點未停過手，真係畫到手軟。
古先生一家大細噚日行經尊子檔攤，特別叫囝囝畀尊子畫番幅。今年就讀中六嘅乒乓球精英運動員沈泰鋒畀尊子畫頭像之餘，仲激動到上埋台演講力撐艾未未，話艾未未講真話都要俾人捉，真係好過份，令人擔心香港嘅言論自由亦隨時保唔住。冇見一排嘅周澄，噚日亦有現身，同社民連一齊撐艾未未。