李嘉欣今年2月初為老公許晉亨產下囝囝Jayden，噚日係嘉欣做媽咪後過首個母親節，為咗同老公及囝囝慶祝，前日嘉欣喺新加坡一做完嘢即刻搭飛機返港。噚日母親節，嘉欣約咗老爺同奶奶一齊過節，佢仲同舊愛劉鑾雄（大劉）前後腳到灣仔福臨門嘆茶，睇嚟佢兩個真係好鬼有緣。
老公拖到實
嘉欣老爺奶奶許世勳伉儷12點幾先去到酒樓，再過10分鐘就見到嘉欣同老公許晉亨一齊坐車到達，嘉欣落車時老公仲對佢呵護備至拖到實，嘉欣已完全收身，狀態唔錯。
嘉欣前腳入，不到5分鐘又輪到細劉（劉鑾鴻）陪住媽咪嚟到，然後就到大劉同呂麗君，今次佢哋只帶個女，唔見細仔，大劉又係急急腳行入酒樓。到兩點幾，嘉欣同老爺奶奶食完飯一齊離開，佢哋走咗唔夠3分鐘，大劉一家就即刻出晒嚟，明顯係等舊愛一家走咗先出嚟，可能唔想撞到正。