有時，一個人嘅諗法，可以係一夜之間改變，就算以前點樣惡人惡相、犯眾憎，或者總會有一日會改過自新，由魔鬼變番做天使，艾迪巴約可以話係一個典型例子。
艾迪巴約以前效力阿仙奴時，因為唔多滿意自己嘅人工，就大跳草裙舞，結果加盟咗富豪球會曼城，過住超級球星嘅生活，周薪都成十幾萬鎊；仲不特止，對番兵工廠時入波後，蓄意走向阿仙奴球迷面前慶祝，擺明挑釁，好多球迷都因此唔鍾意佢。
幫埋高路托尼外家兄弟
不過，呢位季中外借至皇家馬德里嘅多哥前鋒，或者受到去年出戰非國盃時，遭到槍手襲擊隊巴事件，死過翻生影響，性格大變，最近仲決定做埋「非洲版黑俠梳羅」，濟世為懷，幫非洲人逃離戰火苦難。就連佢嘅曼城隊友高路托尼嘅外家兄弟，都受佢恩惠，幫佢哋離開受惡勢力入侵嘅家園，寄居佢喺多哥嘅大屋㖭，情況同當年「黃雀行動」嘅幕後主腦所做嘅差唔多。唔單止咁，艾迪巴約決定喺今夏返祖國，興建一所超級大屋，畀100個孤兒入住，而佢亦一直資助去年受槍擊所襲、而唔能夠正常行路嘅國家隊隊友奧比拉爾，有時每個月畀成3,000鎊（約38,000港元），非常慷慨。
身為聯合國兒童基金大使嘅艾迪巴約，仲呼籲好似佢嘅英超非洲球星，包括杜奧巴、艾辛等加入呢個救非洲人行列，認為呢類非洲富豪球星，絕對有能力幫助更多嘅受苦非洲人。
C朗對西維爾「大四喜」
不過，呢位曼城借將「非洲梳羅俠」來季差不多肯定唔會繼續喺皇馬陣中，就算上周六西甲大勝西維爾6:2一役有上陣；而呢場大勝，最搶鏡嘅始終都係基斯坦奴朗拿度（C朗），演出「大四喜」，仲係神射手榜暫時領先美斯；其餘兩個入球來自沙治奧拉莫斯同卡卡。