Tablet當畫板　又篤又畫

面對iPad2搶攻，一眾AndroidTablet除咗繼續機海攻勢外，搞搞新意思亦不失為一個好計策。HTC首次踩過界推出TabletFlyer，喺傳統篤手指之外，仲跟多支「畫筆」，可以畫公仔寫大字，原來Tablet都可以當畫板用！

記者：許福合
攝影：林栢鈞
Model：EagleLo

似加大碼手機

Flyer有個7"屏幕，使用Android2.3，官方就話可升至3.0，並配有HTCSense介面，首頁就會見到招牌嘅揭頁式時鐘，如果將Flyer與HTC手機放埋一齊，就好似係加大碼版手機一樣。
機身使用一體化鋁金屬外殼，與同樣係7"嘅SamsungGalaxyTab比較，個人玩落覺得手感仲好啲。今個月落場嘅Flyer會有3G版同Wi-Fi版之分，留意CPU並非最近谷緊嘅雙核，仍選用舊款單核U，不過時脈提升到1.5GHz，初步試用反應一啲都唔輸蝕！

HTCFlyer
售價：未定

■使用一體化鋁金屬外殼，手感唔錯。

■後置鏡頭有500萬像素，可玩後期特別效果。

相片畫公仔

同其他Tablet最大不同！喺Stylus筆快被淘汰之時，Flyer反其道而行，Stylus復出，支援HTCScribe，用筆篤一下右下角繪圖圖示，就會變成手寫板，可以在相片上畫公仔，而且右下角出現嘅色盤，仲可以選擇唔同筆款、粗幼及顏色；實用一些，可在文件或網頁上做筆記，要儲存或分享圖檔時，筆迹會紀錄在內。不過，試用時遇到一個問題，係唔能夠同時使用手指觸控同手寫筆操作，要先退出手寫模式，才能篤芒。另外，手寫筆需使用3A電芯，小記做測試時就試過玩到無電、無晒反應，需要換電。